حكايات

أصالة تنتصر على قاسم سليماني

بروفايل :غادة أحمد

362 عنوانا على صفحات الورق وصدر المواقع الألكترونية عن طلاق أصالة من العريان يقابلها 261 عنوانا عن الضربة الأمريكية والتي نتج عنها مقتل قاسم سليماني . مقارنة رقمية على مدى 48 ساعة فقط تقدم لك نتائج صادمة عن الذوق البحثي العربي . وعلام يفتش القراء وأىّ الأخبار تلامس الذائقة وتشبع العقل ؟

وعلى الرغم من وجود مطلقة كل ست ثواني في مصر إلا أن أحداث كل المطلقات توارت وأخذت مكانها في الصندوق الإعلامي الأسود فيما تصدّر طلاق إصالة المشهد بلا مبرر وبشكل مبالغ فيه.

سياحة لدقائق مع العناوين أجمل من رحلة لأسبوع في باريس ..( طلاق أصالة من العريان .. أسرار وراء طلاق العريان .. آخر ما قالته أصالة قبل الطلاق .. الشغالة تكشف الحقيقة.. العريان يهدّد بالزواج . أصالة تكشف خيانة العريان ..المسكوت عنه في طلاق أصالة .. العريان : هتجوز تاني وأصالة تتوعد .. أصالة تكشف الغطاء عن طلاقها من العريان .. فتاة سورية وراء طلاق أصالة .. زوج أصالة يبكى وينهار  .. اصالة تنشر صورا مع العريان على الانستجرام )

طلاق أصالة اتحوّل بعناوين الصحف لحدث قومي وتهديدات العريان اقتربت من ” النووي ”  والحكاية في نظري ” اشتغالة ” إعلامية متسويش تلاته مليم .. مين هى أصالة ومين هو العريان علشان جوازهم يفرّح شعب وطلاقهم يغيّر نواميس الكون ؟

الحقيقة في كلمتين .. أنا صحفية عشت سنين في مطبخ الصحافة و فاهمة حكاية ” التنجيم ” وعارفة إزاى نموّت نجم وندفنه وإزاى نصحيه من جديد على الورق حتى لو كان رصيده كله غنوتين .

( سوق الأغاني خلاص مبيصنعش نجوم  دا زمن فات وانتهى بوردة وفايزة وأم كلثوم .. الطلاق دلوقتي هو  البديل ..الفنانة لما تطلّق تكبر في عيون الإعلام .. هو دا اللي حصل مع الخشاب وأصالة وأنغام  وغيرهم . أول تليفون بعد الطلاق مش بتعيط فيه النجمة وتقول: ” ألحقيني يا ماما ” دى بتكلم الصحفيين ..علشان يخدولها بعد الطلاق صورة ويكتبولها عنوان .. طلاق الفنانات مش خراب بيوت زى ما انتم فاكرين دى حاجة كده زى الحقنة في غرفة الانعاش بتفوق الميّت شويتين)

أصالة فاقت وفوّقت العريان وعدّوا الاتنين حرب أمريكا وإيران مش لأنهم قدموا فن يعيش مع الأيام  لأنهم اشتغلونا بحكاية الطلاق وأسراره وحكاياته .

كلمة أخيرة أحبّ أقولها لأصالة والعريان .. يوم ما اتجوزتم مكناش معازيم معاكم بنفرح .. ليه يوم الجنازة عايزينا نبكي ونشيل الميّت ؟ ليه كل التصاريح والبيت بيخرب ؟ ليه عاملين في الجرايد زحمة ؟ دا احنا اتعلمنا ان الجواز سكن وبيوت مقفولة على اصحابها والطلاق صدمة ..ليه بتقلبوا الميزان وتغيروا نواميس الكون … الجرايد ياحبايبي للأخبار فقط عمرها ما كانت مأذون .

 

 

 

 

الوسوم

مقالات ذات صلة

زر الذهاب إلى الأعلى
إغلاق
إغلاق