حكايات

الفرق بين أم عبده و فيفي عبده

بوردنج – خاص

أنا لما بشوف نجمات السينما اللي عدّوا السبعين والتمانين زى نبيلة عبيد وفيفي عبده وميرفت أمين أفتكر عالطول أم عبده جارتنا لما كان عندها خمسة وخمسين وأستغرب بجد شويتين.

كنا كل يومين أنا واخواتي نجري بأم عبده على المستشفيات ودول اللهم صلّي على النبي بيجروا عالحفلات والسهرات زى العغاريت . أقول هو فيه إيه ؟ دى أم عبده بتاكل سمن بلدى والتيك أواى محرّماه عالبيت ودول بياكلوا شيبسي واندومي وحاجات مليانه زيت .

أم عبده ست ريفيه متربيه عالخير ودول بيشربوا سجاير ويشدوا شيشة ويطلّعه دخان من المناخير .أم عبده اتجوّزت راجل واحد جسمه نحيف زى الفتله يعني متعبش أم عبده ودول أقل واحدة اتجوزت عشرة كل واحد بطل كمال اجسام أكيد تعبوهم كتير وبرضه مفيش تأثير.

أنا مبتكلمش على الشد والنفخ والتصغير والتكبير اللي بيعملوه النجمات..بتكلّم على الحركات والرقص والسهرات وأم عبده ياعيني نايمة بتغني ظلموه .

الغريب أن الفرق بينها وبينهم تلاتين سنة . قلت: يمكن أم عبده اتوّلدت تعبانه وللا عاشت شقيانه لقيت أم فوزى صاحبتها زيها بالظبط . نفس العُمر ونفس الوجع والدوا  كمان بيقولوا نفس الكلام زى ما يكونوا مذاكرين آه ياراسي وآه يارجلي وآه ياصدري أما دول بيرقصوا ويغنّوا ” ادحرج واجري يارمان وتعالى على حجري ”

اللي مستغربله شويتين دول تلاتين سنة مش سنة وسنتين  .. تلاتين سنة فرق بين فيفي وأم عبده ونبيلة وأم فوزي . تلاتين سنة فيها عيال بتتولد وتكبر وتتجوز وتخلّف ويمكن تموت . تلاتين سنة هي نفس عُمر حرب البسوس تقريبا –  أطول حرب في التاريخ . تلاتين سنة بتتبنى فيها عماير وتتهد جسور .. أيام تعدى ورا أيام و أم عبده نايمة من التعب وأم فوزي صاحية من الوجع وفيفي ونبيلة هاتك يادلع .

أم عبده ياعيني وشها كرمش وفيفي خدودها وردي ولسّه مزّه والسؤال يفضل سؤال اشمعنى أم عبده وأم فوزي حظهم فنكوش وفيفي ونبيلة مبيكبروش؟

سألنا الدكتور بدل ما يكتبلنا روشته دوا تصغّر أم عبده شويتين قالي: ياسيدى الفنانات دول خدوا الدنيا وأم عبده ليها الآخرة   الدكتور اتحوّل شيخ فجأة لأنة مش فاهم السبب ولا عارف السرّ ..ليه أم عبده بتعيط ليل نهار من وجع الرجل والصدر والراس وهمّه في نفس الآوان ونفس الزمان بيلعبوا جولف في نادى الطيران.

فيفي عبدة لسه مزة ونبيلة عبيد برضه مزة وميرفت أمين مزتين . التلاتة بجد قمرات و غزلان . وأم عبده خمسة وخمسين وبتقول حسن الختام .

تقولولي بقه شدّ وش ونفخ صدر وتكبير شفايف وتصغير ودان . أقولكم وماله ؟ طلّة حلوة في وش فيفي ولا سنة همّ مع أم عبده .

 

الوسوم

مقالات ذات صلة

زر الذهاب إلى الأعلى
إغلاق
إغلاق