من هنا وهناك

حكاية وزيرة حلوة اسمها زغلول

بروفايل : غادة أحمد

أنا مش بكتب من جديد لكن بكمّل اللي كتبه غيري في نفس المكان ..بكتب عن إسعاد يونس صاحبة أجمل نقلة في برامج التوك شو .. بكتب عن إعلامية صنعت سعادة في كل بيت ..بكتب عن سيرة ناجحة عدّت الحدود وبقت تميمة فرح حتى في الخليج .. بكتب حكاية وزيرة حلوة اسمها زغلول ..بكتب عن صاحبة سعادة و فخامة كمان .

إسعاد يونس نفذت التوك شو صح زى مادرسناه برّه وعرفناه .مخترعتشي العجلة ولا عملت كيميا .. لمسة ثقافة وشويه مهارة وكتير شطارة خلّت الطبخة حلوة والوقت يجري بينا من غير ما ندرى .

اسعاد يونس بتسيب الضيف يتكلم أكتر ما هيه بتتكلم ودا ذوق الحوار وشياكته لا بتعمل نفسها ظابط بيحقق في قسم ولا قاضى بيهدد ضيفه بقص الرقبة . بتحترم الضيف وكمان المتابع اللي عايز يسمع معلومة ليها قيمة وفايدة .

اسعاد يونس صاحبة مدرسة في الحوار علمتنا إزاى نطلّع سؤال من قلب سؤال . إعلامية مش عايزه اعداد ولا سكربت مكتوب لأنها بجد الاستاذ .. عارفة بتقول إيه ورايحة بالضيف فين.

لما كتب زميلي هاشم شعت من أسبوع عنها شكرته مش لأنه كتب حلو  لأنه دوّر في كوم القش ولقى وردة . هاشم زميلي فلسطيني مش مصري مكتبش عن بنت بلده . كتب عن إعلامية مصرية دخلت قلبه وقلب شعبه . سماها هاشم الوزيرة وهى بجد تستحق وأنا بسميها  الأميرة لأنها برضه تستحق.

يمكن تسألونا إيه حكاية اسعاد يونس مع مجلة بوردنج وليه تكتبه عنها مرتين ؟  الاجابة وراها أربع أسباب.

  • الإعلامي الصح بيصعب عليه الفن ..لو شاف كلمة غلط في جريدة يزعل ولو سمع وجهة نظر خايبة يغضب ولا قرا مقال هايف يتنرفز ويتعصّب لكن لو شاف إبداع يرقص ويفرح ودا اللي حصل معايا بجد مع الوزيرة زغلول ..كل يوم بحترمها أكتر وأكتر لأنها بتعرف تعمل طبخة ونفسها على ترابيزة الإعلام زى السكر.
  • لمّا التوك شو  يبقى زحمة والفضائيات لمّه النطيحة والموقوذة واللي أكله  السبع وقطّعه تقطيع يبقى من حق الحلوين كلمة إنصاف واشارة خضرا علشان يكملوا ويبدعوا ويقدموا شغل جميل .
  • لما تتغير موازين الحوار لحدّ متعرفش مين المذيع ومين الضيف؟ يبقى واجب علينا نميّز ونفرح بالشتا الحلو لما ييجي بألوان ورده ونقول أبعد ياخريف .
  • لما تلاقى الإعلام فتح بابه لبتوع الكورة والفنانين النص لبّه واداهم برامج يتعلموا فيها الكلام  يبقى لازم تقوم من مكانك وتقول لإسعاد ” تعظيم سلام “

هو ده اللي خلانا نكتب حكاية زغلول الحلوة مرتين ..لأنها تستحق  منا ومن غيرنا ألف كلمة حق.

شكرا للوزيرة الحلوة ..أهلا بالشتا .. ابعد ياخريف لو شفناك تاني هنغمض عين ونقفل عين ونسد ودانا بقطنة كمان ..أبعد ياخريف أبعد ياخريف.

 

الوسوم

مقالات ذات صلة

زر الذهاب إلى الأعلى
إغلاق
إغلاق