بروفايل

غادة أحمد : أشكي لمين في 2020 ؟

بروفايل : غادة أحمد

أنا مش عارفة أحكي لمين واشكي لمين عن الظاهرة الإعلامية الغريبة اللي اسمها أحمد موسى . الراجل ده بجد هيموتني ناقصة عُمر ويمكن يموّت قرّيب نص مصر .. ومع زحمة القطاعات والوزارات اللي ماسكه الإعلام خايفة أخبط في أى مكان واشكى لناس مش مسئولة.

فكرت كتير أكتب لياسر رزق الراجل الفاهم وللا أشكي لأسامة هيكل الراجل العاقل وللا لمكرم محمد أحمد صاحب الخبرة والتاريخ .وأقوله ليه ياريس العك والبطيخ ؟ دا أحنا شعب حضارة علّمنا كل العالم . فيه إيه ؟ وجرالنا إيه ؟ ولما احترت أشكي لمين . قلت أرفع شكوتي للكبير  .وأقول الرحمة من عندك يارب.

فيه خمسة وعشرين شرط اتعلمتهم وأنا في امريكا لإختيار المذيع ..بحس بجد إن موسى ده مش واقع منه شرط ولا اتنين ولا تلاته ولا حتى عشرة .. دا مش متوافر فيه ولا ربع شرط . طلع علينا منين؟ ومين اختاره وليه وأمتى وفين وعشان إيه ؟ وياترى دا انسان زيينا ولا كائن تاني نزل علينا من كوكب فضائي.

الشياكة مفيش والطلّة الحلوة مفيش والثقافة بح واللباقة أوف والقدرة الحوارية غايبة والمعلومة عكّ والضحكة سخيفة والبدلة غريبة وصوته عالي ووشه قديم ومعندوش كاريزما بتلاته مليم .كل ده ممكن نعديّه.. وتعالوا نبص لموضوعاته .. حاجة كده زى الملوخية البايته في التلاجة ..دا مش كلامي داكلام ويكبيديا.

موسى المذيع الوحيد في مصر اللي ويكبيديا مش جايبة سيرته زى كل الناس .دى جايبة سقطاته الاعلامية وهبل المعلومات اللي بيقولها .. ادخلوا واقروا عنه .. سايب تاريخ بريحة الفسيخ .. ورغم ده كله بيطلع علينا لغاية دلوقتي علشان يعذبنا ويعذب دماغنا ويلخبط معلوماتنا وعامل فيها أبو العرّيف .

كفاية بجد حرام دا إحنا في 2020 ..الدنيا بتتقدم لكن الراجل ده واخدنا لورا ويقولنا معلومات من قصص تخ تخ وميكي وتان تان يفتكرنا بنتفرج عالهوا ومختومين عالقفا .

مرة جاب فيديو للعبة أطفال فيها مسدسات وطاخ وطوخ وطيخ وقالنا دا هجوم روسي علي تنظيم داعش .. وبعدين طلع علينا في أزمة الدولار والجنيه بفكره ميقلهاش مجنون في مستشفى العباسية وطلب من البنك المركزي يطبع  100 مليون دولار ويضخهم في السوق .يفتكرها كوتشينه وللا ورق كراريس .. وبعديها دخل على اليابان وقال لتر البنزين يـ 15 دولار طلعوا اليابانين المؤدبين اللي عمرهم ما غلطوا في حد قالوا ايه ياعمّ العك ده؟ البنزين عندنا بدولار ومعنداش أزمة وكلامك مالوش تلاته لزمة.

كفاية حرام د احنا في 2020 ..والشعب بقه عنده وعي وفاهم وعارف حتى أولادنا بيدخلوا على النت والشات وبيتكلموا لغات.

الحلّ مش أن موسي ميطلعش تاني مع بدايات السنة الجديدة ..دا حلّ مش صح ..دا لازم يدفع لكل بيت مصري وعربي وخليجي أربع فواتير . كهرباء زيادة واستهلاك عقل وضياع وقت وفاتورة عك .. دا مطلب جماهيري  .يدفع يعني يدفع .

وأنا نازله الشغل من يومين سامعة بنت عسوله بتقول لأمها ..دا عمو موسي بيقول ..  بصتلها أمها وقالتها بصوت عالى: أنت ايه اللي بيخليك تتفرجي عالراجل ده ..أنا مش حذرتك ألف مرّة .. والله والله مافيه مصروف . جريت عليهم قلتلها فيه إيه يانادين؟. قالت: شفتي البنت اتفرجت على موسى أعمل إيه ؟!!! افرمت دماغها إزاى ؟ البنت راحت منى خلاص . راحت مني ياغادة.

بصيت للعسل وقلتلها :  لأ لأ  كده كتير ياحبيبتي .. كده غلط ..ماما ليها حق..أنا معاها طبعا .. لا مصروف ولا حلويات.

خدنا ايه بقه من موسى ومن الطاخ والطيخ و معلومات البطيخ وريحة الفسيخ ..أهو ضيّع عالبنت المصروف.

حلفتك بولادك يا موسى بيه بلاها إعلام .. دول مش شرط ولا اتنين واقعين منك دول خمسة وعشرين.

الوسوم

مقالات ذات صلة

زر الذهاب إلى الأعلى
إغلاق
إغلاق