بروفايل

 انتحار عريس من برج العقرب

بروفايل : غادة أحمد

مشكلة العريس ده مكنتش في أزمة فلوس ولا قلة وسامة ولا عربية حلوة تخطف عيون البنات. كانت أزمته في الصفات اللي بيقولهاله العقرب ومش لاقيها جواه. البرج بيقوله كل يوم في الجرايد والمجلات أنت شجاع وذكي وعندك عاصفة تدميرية للأشياء وكمان مُبدع وخلاق وعندك عزيمة وإصرار مش كده بس دأنت معشوق البنات والستات وبتعرف تكوّن علاقات لكن الواقع اللي بيعيشه بيقوله غير كده ..ودا اللي تعبه ومحيّره.

كل يوم يشترى الجرايد ويفتح على العقرب ويدوّر على الناس اللي معاه في البرج يلاقي بسم الله ماشاء الله  معاه منى زكي واليسا ومحمد منير وعمرو دياب. ناس حلوين رجالة وستات وبتلعب بالفلوس لعب . لكن هو لاشجاعة ولا ذكاء ولا بيدمّر الأشياء ولا عنده كاريزما تدوّب البنات .

أمه تقوله يا فوزى كفاية أبراج والناس تقوله دي تخاريف جرايد ومجلات وشيوخ تقوله حرام لكن هو كان بيحب حنان وواثق في حنان.

حنان دى بنت مفيد فوزي الإعلامي الكبير بيسمّوها أيقونة الأبراج العربية. ست شاطرة درست كل الأبراج وفاهمة كل الصفات وعارفه البرج المائي من الناري والحلو من الفقري وبتركّب الرجالة عالستات في الجوازات زى المأذون.. بتقول العقرب اتجوّز سرطان وتقول للأسد خش متخفش على العذراء وكمان بتقول للحمل أنت تعبان والحوت انت عندك ضعف جنسي. يعنى الخلاصة ست عارفة القرد مخبي أمّه فين.

حنان بقه لخبطت الواد .لاعارف هو خجول وللا بتاع نسوان. جرىء وللا جبان . فاشل وللا عنده قدرة على التدمير. حلو زى أليسا وعنده كاريزما زى منير وللا إيه بالظبط.

حاول يجرّب زى ما قالتله حنان . كل ما يحبّ بنت تقوله أنت أهبل وكل ما يدخل خناقة ينضرب ضرب الحمار في مطلع وكل ما يذاكر يسقط وكل ما يفكر يغلط ويروح بعيد .

حنان بهدلت الواد ..ماشي ماسك كتاب حنان زى ما يكون ماشي بجوجل ماب اللي بيوّصل العربيات للأماكن ويعرّف الناس الشوارع. حنان تقوله يمين يلبس في الحيطة وحنان تاخده شمال ينزل في بلاعة.

حنان ضيّعت الواد ..لغاية ما أمّه قالتله اسمع ياواد بلا حنان بلا ترتان ولا عقرب ولا سرطان دى ست بتهجص وتبيع كلام. احنا مخدناش من العيلة دى إلا التخاريف ومشفناش منها إلا شعر البنت ومناخير أبوها.. لكن فوزي ولأول مرة في حياته يردّ على أمه قالها إلا حنان إلا حنان ..وجري خد علبه باندول كاملة وسافر للعالم البعيد .

خدنا إيه بقه من اللخبطة اللي عملتهالنا الست حنان ..أهو فوزى راح بسبب العقرب وبكره يروح خمسين فوزى من الجدى والحوت والزفت والسرطان .

ياناس اسمعوني  ..برجك الحقيقي شغلك وعملك وإيمانك بقدرك ..برجك الحقيقي قلبك وضميرك .. الله يرحمك يافوزى .  وصدقتي ياأم فوزى مخدناش من عيلة حنان إلا الشعر والمناخير .

 

 

 

 

الوسوم

مقالات ذات صلة

زر الذهاب إلى الأعلى
إغلاق
إغلاق