حكايات

رسالة من السندريللا

تكتبها غادة أحمد

لو كان بمقدور السندريللا العودة للحياة لثلاث دقايق فقط كانت بجد قالت : ( الله يخرب بيوتكم ..هو انتو موركوش غيري ..فيه إيه؟ !!.كلام كلام ..هو انتو كنت مستنيني أموت علشان تعملوا فهلويّة وشطار وتطلعوا أسرار كلها كدب وافترا ..ياريتني ماكنت ممثلة ولا شفت سينما ولا تلفزيون . لا ارتحت من كلامكم وأنا عاشية ولا عارفة أنام .. وبعدين أسرار إيه اللى يعرفها صحفي صغنون ابن امه دانا  لما كنت نجمه كان لسه بيعملها على روحه .

فاتن ومريم وشادية وفريد وحليم ماتوا ..اشمعنى أنا ماسكين في سيرتي ومش ساكتين ..صلولي ركعتين وللا ادعولي دعوتين ولا حد يزكي  عني وللا يحج مكاني علشان ربنا يغفرلي …بدل ما انتو عاملين زى اللتاتة على الورق ..مرة صفوت والقذافي ومبارك وحليم وعبد الناصر . بهدلتوني وشوهتم تاريخي . دانا ياما فرحتكم ..مالكم بيه .. سبوني ارتاح .. دا ربنا اللي بيحاسب الخلق مش انتم )

دا الردّ التخيلي اللي بكتبه نيابه عن أجمل وأطعم فنانه شفتها عيني ..فنانة علمتنا الشياكة  والجمال والضحكة الراقية . بكتب الرد وبستأذنها بعد ماقريت مذكرات كتبتها مجلة مصرية عنها ..مذكرات حرق فيها الصحفي تاريخها وشوه ملامحها ووصلها لينا بصورة غير اللي عرفناها وحبناها .

حكايات مكتوبه بقلم بايخ وحبر رذيل بستأذنكم أعيد برجرافات منها ” صفوت الشريف استدعى السندريللا  في مكتبه وطلب منها تخدم مصر قالتلو إزاى ؟ ولما شرحلها ضربته بالقلم وبعدين استجابت لطلبه ومثلت 18 فيلم إباحي …يومين وقلتلو أنا عايز اتجوّز حليم ياصفوت قالها مش ممكن أنت متجوزه مصر وجاب عبد الحليم وراه الأفلام لحظتها جت  للعندليب أزمة ونزف دم ..شكت لحسني مبارك من اللي بيعمله صفوت راح صفوت سافرلها لندن وقامت بينهم خناقة وضربته بسكينه كانت بتقشر بيها تفاح .. ورجع الصحفي وقال : القذافي اتدخل في الموضوع وبعت سيف الإسلام يتفرج علي الأفلام وقال لأبوه فعرض 100 مليون دولار علشان يشتريها كمان عبد الناصر كان بيتفرح  كمان على أفلام سعاد ويسميها الفياجرا )

كفاية لغاية كده براجرافات وكفاية كده هبل وحكايات .. لو كان دا كلام صحيح الله يسامحها راحت بأيامها وان كان تأليف يبقى لينا مع المكتوب وقفة.

الكلام ده غيّر ملامح السندريللا في عيون الناس وحولها من نجمة حلوة تركت في قلوبنا بصمة لحكاية وحشة مش عايزين نسمعها.

أنا بسأل ليه نكتب كده ؟ دى الصحافة أمانة ومسئولية وبعدين إيه المعلومات والأسماء والتفاح دا كله ؟ وفياجرا ايه اللي عايزها زعيم عظيم كمان القذافي كان عايز يستر الأفلام ويحرقها وللا يتفرج عليها هو وابنه بالليل ؟

ياناس كفاية بهدلتوا السندريللا الحلوة وهيه دلوقتي عند الرحمن . بهدلتوها بالكلام ..اكتبوا لينا مجد حلو  نرفع بيه راسنا لاسبتم رئيس ولا زعيم ولا نجمة ولا فنان ولا تفاح كمان ..  كده بجد أنا عرفت ليه الدنيا بترجع  بينا لورا .

 

الوسوم

مقالات ذات صلة

زر الذهاب إلى الأعلى
إغلاق
إغلاق