تقارير سياحية

غادة أحمد : وين الشبشب ياماى

غادة أحمد – بوردنج

مين قالنا أن الحرامي قلبه جامد؟ ومين اللي خلانا أول مانسمع دبّه رجله نجري ونصرخ ؟ ومين اللى عرّفنا أنه لازم يكون شايل معاه سكينة ومطوه ومسدس ؟

كلام كتير اتقال عن الحرامي ..بيراقب البيت مظبوط ويخطط صح ويحسب كل حاجة بفن ..مبيسبش حاجة للحظ ولا يعرف النسيان ..معاه طفاشة لكل بيت وواحدة تانية لكل دولاب .عارف مكان الفلوس قبل ما ييجي..لابس ساعة جرينتش وأهم حاجة عنده الوقت .. كمان لابس قفاز عشان البصمات وجزمة كوتشي علشان الخطوات متعلمش عالبلاط .

كل ده موجود في الحرامي !!!. صدقوني لو هيه دى صفاته. يقظة ودقة وذكاء وفن واستراتيجية وتخطيط و نظرة صح للمكان والزمان وحرص على البصمات والخطوات وساعة جرينتش وحركات.. أكيد هنكون محتاجين في بلدنا مليون حرامي يرسموا لينا المستقبل .

الحقيقة أن الهبل والعبط فينا .دا الحرامي قطة لو قلتله (بخ ) هيعيّط وينط من الشباك . عموما أنا هقولكم ليه إحنا بنخاف؟

المشكلة مش في الحرامي .المشكلة في موسيقى الرعب اللى ورا الحرامي هى دي اللي بتخوفنا بجد وهو دا الدرس الخايب اللي علمتهولنا السينما.

أول ما يدخل من الباب تعلا الموسيقى التصويرية المرعبة ولما يتقدم للدولاب تزيد خالص ولما يقرّب من شنطة الفلوس تعلا زيادة ولما يخلص ويخرج بالشنطة تهدا زى ما تكون الموسيقى بتقوله : شكرا برافو عليك.

صدقوني الموسيقى هى اللي زرعت فينا الخوف مش الحرامي.. الموسيقى نسجت لينا جو مخيف كمان خلت الحرامي في عيونا حريص وذكي وكمان فنان .

مظنش في بيت في مصر – غني كان وللا فقير – إلا وزاره حرامي . ترك بصمته وخد شنطته .مش مشكلة هرب أو اتمسك .المهم المشاهد اللي قدمناها احنا لما شفناه .. مشاهد مبتتغيرش خالص من اسكندرية لأسوان تبدأ بيالهوي ويادي المصيبة وصراخ وعيّاط والحقونا ونستخبى تحت السرير ونتكلفت في اللحاف ونسيب البيت والعيال ونجري على السلّم.

معقول دا كلام !! كل ده علشان حرامي مالهوش تلاته لزمة !!. أنا عايزاكم لما تشوفوه ليل أو نهار ..تخين كان أو طويل ..ماسك سكينه وللا ساطور تدخلوا عليه بقوة .. وكل واحدة بلهجتها وثقافتها ومستواها التعليمي ..واحدة تقوله : اقف مكانك ياسافل اخص عليك . وواحدة تقوله : اوعى تتحرك ياواطي هات السكينة وتديله قلمين . وواحدة تقوله شيفاك ياحيوان وجيالك حالا.

وين الشبشب ياماى..دا أول سؤال وأهم سلاح تدوروا عليه . ماهى الحرامية بتخاف من الشبشب زى الصراصير.

قال فن وتخطيط  ورؤية وقراءة وحرص وذكاء وكوتشي وساعة جرينتش !!  دا قطة لابسه فيل .

الوسوم

مقالات ذات صلة

زر الذهاب إلى الأعلى
إغلاق
إغلاق