بروفايل

رامي اتقدملي . بابا وافق ليه؟

بروفايل : غادة أحمد

إمبارح حلمت حلم غريب جدا .. قولوا اللهم إجعله خير . حلمت إني لابسة فستان أبيض بطرحة طويلة وكنت بجد زى القمر  بس كنت بعيط وأصرخ وأقول مش عايزه الراجل ده مش عايزه الراجل ده وماما تقولي عيب دا شاعر كبير وراجل بتكتب عنه الجرايد والمجلات وكمان دنجوان يعني لو موافقتيش ألف واحدة تتمناه .

قلتلها مش عايزاه . طلع بابا من الصالون على الصوت وقالي اخرسي دي أم كلثوم بتموت فيه وهتجنن عليه.

طلع مين بقه العريس ؟ أحمد رامي ..مش عارفه إيه اللي جابوا عندنا في 2020 وجاى بنفس البدلة والكرافتة بتاعة زمان يظهر معندوش غيرها .

قلتله يابابا يتجوز أم كلثوم وللا أسمهان أنا مالي .بصلي بغضب وقالي: أمال أنت عايزه مين شاروخان !! قلتله : يابابا الناس بتطلع لقدام ليه بترجعوني لورا . شعر إيه ودا وقت شعر ..هو أنا فاضيه أقعد قدامه يسبلي في عنيه ويكتب فيه  قصيدة .

طلع رامي من الصالون وقالي مالك ياغادة جرالك إيه ؟ قلتله ياعم روح ابعد عني . أنت رجعت ليه ؟ وإيه اللي جابك تاني أنت بسبع أرواح . قالي أظن كده عيب القصبجي جاى من البلد  .قلتله : كمان جايب أصحابك معاك .

امشي من قدامي والنبي لو هتكتب فيه معلقات مش عايزاك ..أنت راجل بارد بصحيح . وإيه أم البدلة اللي أنت جاى بيها دي كسفتني قدام اصحابي . ماتروح تتجوز والله ماعارفه أم كلثوم جرالها إيه !!! باين عندها عما ألوان .روح من قدامي بدل ما أرمي نفسي من البلكونة.

بصلي بعينيه اللي مش عارفه رايحه فين . وقالي أنت زودتيها خالص ياغادة قلتله ولسه أنت شفت حاجة .. جريت عالبلكونة  ارمي نفسي جريت أختي مسكتني من الطرحة ..صحيت من النوم .

مش عارفه إيه الحلم ده وليه ؟ رغم إن آخر أغنية سمعتها امبارح ( آه لو لعبت يازهر) ..مفيش أىّ اتصال بين اللي سمعته واللي شفته وأنا نايمة.. دا لو الزهر هيلعب كده بلاها لعب.

بسأل ماما  إيه الحلم ده ؟ قالتلي دا رزق واختي قالت دا منصب كبير مستنيكي و بنت عمي قالت : فلوس كتير جايه بتجري. كلها تفاسير زى التخاريف . مش فاهمة إيه اتصال رامي بالرزق والفلوس اللي جاية في الطريق؟

مش هخبي عليكم قمت زعلانه جدا وبعيط برضه .. واللي كان هيجنني ومزعلني بجد ليه بابا وافق بسرعة .

عموما رامي شاعر كبير ..له تاريخ في الشعر والتعبير..مش المشكلة في الحلم .. المشكلة في التفسير.. لو قنبله نزلت فوق دماغ واحد في الحلم وقسمته نصين يبقى رزق ولو تمساح أكل راس حدّ يبقى منصب كبير ولو واحد نط من البرج واتفتت ألف حته يبقى خير جاى يجري ..إحنا كده مش هنتغير أبدا ..بنفصّل تفاسير على مقاس اللي بتمناه .

أنا أعرف واحدة حلمت أن جوزها مات ..أمها قالتلها خير يابنتي ..موته معناه إن أم فوزي جارتنا هتحج السنادي .

هو ده العريس بنفس البدلة ونظرة عنيه ..قولتوا إيه .وليه ..وفيه إيه ؟

 

الوسوم

مقالات ذات صلة

زر الذهاب إلى الأعلى
إغلاق
إغلاق