بروفايل

الشيخ يكتب: شعرة صابرين

رؤية : محمود الشيخ

الناس شاغلة نفسها بصابرين.. خلعت حجابها وسابت شعرها وبسم الله ماشاء الله عليها مش لابسه باروكه .. بوستات وتعليقات وحوارات واحاديث في الراديو والتلفزيون ..فيه إيه ؟. ماتخلع وللاتلبس وللا ترقص في حارة ضلمه  .. إيه حالة الروقان والفضا اللى احنا فيها دي . آمال لو اتبنى سد النهضة هنعمل إيه ونكتب إيه ؟

شعرة صابرين عملت أزمة من غير لازمة في مصر والوطن العربي .شعرة طلعت الفنانات طوابير منى زكي بتأيد وسهير رمزي بدافع ورانيا يوسف بتشجب وروجينا زعلانه ونشوى بتقول حرام ؟ مؤيدين كتير في حرب الشعرة . حتى المذيعين الرجالة اللى من غير شعر خالص  دخلوا في الخط  وزعلانين  .

العملية بسيطة محتاجة بس دقيقتين ..هو إحنا عايزين إيه من صابرين ؟ فنها وتمثيلها وأداءها المقنع على الشاشة وللا عايزينها “رابعة العدوية ” ..إذا كان على الفن سبوها تمثل بشعر وللا من غير . وإن كان على رابعة ..رابعة ماتت من زمان .

أنا صحفي سياحي مش بكتب في الفن ..بس حرب الشعر حسستني بجد إني عايز أقطع شعري وأتحول لراجل أقرع.  حرب الشعر خلتني أتأكد أن صابرين فنانة عزيزة و الشعر كمان عزيز .

بلاها حجاب ..المحجبات في الشارع زى الرز . وطرحة الراس بقت ألوان أحمر وأخضر وفوشيا كمان .. مش كده بس دي ربطة الطرحة بقت إبداع .. بلاها حجاب وقدمو لنا فن جميل . مش محتاجين منكم أكتر من كده .

مفيش حاجة محيّراني في حرب الشعرة إلا الناس العاقلين الحلوين اللي بيطلعوا في التلفزيون يكلمونا في السياسة والإقتصاد وأزمات العيش والبنزين ..همه همه طلعوا علينا في شعرة صابرين ..نفس الصوت و ” نفس الزور”  زى ماقال نجمنا علاء ولي الدين .

صابرين صنعت بشعرها تاريخ مصنعتوش بفنها ..عرفت وزنها عند الناس – مؤيدين ومعارضين – بشعرة واحدة . وأنا صحفي كبير قلمي حلو .بجري في الدنيا سنين  وسنين ولا حد عبرني .

في 2020 شعر راسك أقصر طريق للمجد .. خبيه بس سنتين واطلع بيه فجأة .. هيخطفك التلفزيون .

 

 

الوسوم

مقالات ذات صلة

زر الذهاب إلى الأعلى
إغلاق
إغلاق