تقارير سياحية

علمني الهيافة .. اركب الطيّارة واتفرج

 

بروفايل : غادة أحمد

كل شىء في حياتنا بيجري.. بنلاحق العصر وعجلة الزمن ..بنفكر بسرعة نطلع القمر ونسكن في شقة جوه زحل ..بنبنى برج عالي يقرّب من السما وفندق تاني جنب السمك .. بنسابق السنين لغاية ماخلينا الأيام تجري معانا والسنة بقت شهر واليوم ساعتين ..مش عارفين نربي أولادنا زى ما اتربينا في أيام بطيئة وهادية.

الشيء الوحيد اللي متغيّرش في 2020 أسئلتنا الهايفة . هي دي .. لا عايزة تجري ولا تمشي ولا حتى تحبي  .زي ما تكون مربوطة في عقولنا بجنزير. ودا اللي اكتشفته حقيقي في رحلتي الأخيرة على طيّارة الإمارات وأنا قاعدة جنب الشباك في البيزنس كلاس آخر روقان.

كان حظّي إن قعد جنبي راجل كبير ووسيم وباين عليه الوجاهة .. سلّم عليه برقي وقال : معاك د .فلان أستاذ في الطاقة الذريّة. عرفته بنفسي وقلتله أنا غادة أحمد صحفيّة.  كنت سعيدة بإن جنبي عالم ذرة هيكلمني عن أسرار العلم والإنشطار النووي وثقب الأوزون ومستقبل الأرض بعد كام سنة . جميلة أوى صحبة الناس اللي فاهمة . كنوز خبرة ومعلومات.

اتحركت الطيارة ولقيته بصوته الفخم بيقولي: بصفتك صحفية كنت عايزة أسألك سؤال مهم  ..لحظتها جاتني رعشة وخفت يسألني سؤال في السياسة وللا الاقتصاد وأنا حياتي كلها في السياحة.

قال: ( هو بجد عبد الحليم اتجوّز سعاد حسني وللإ دي إشاعة؟ أنا سمعت إن سعاد مكنتش بتحبّه .. يعني الحبّ كان من طرف واحد وإن تحيّة كاريوكا حذرت سعاد من الجوازة دي وقالتها عبد الحليم عيّان وممكن ميخلفش )

دا كان السؤال اللي سأله  عالم الذرة .ساب الإنشطار  والإيزون والمناخ والأرض اللى بتولع شرق وغرب ودخل في سكة الهيافة  .قلتله وحضرتك شاغل بالك ليه بسعاد وكاريوكا دول سافروا من زمان ودلوقتي في عالم تاني . كمان يهم حضرتك إيه لو الحب كان من طرف واحد وللا طرفين؟

قال بالعكس يهمني الموضوع جدا لأن مكنش المفروض أن كاريوكا تتدخل في الموضوع ده . مفيش أى اتصال بين المرض والخلفه . كان المفروض تبعد تماما عن الموضوع وتسيب الاتنين يتجوزوا .. تصرف مش مقبول أبدا من تحيّة محدش يقبله.

حسيت لحظتها إني قاعدة مع عالم ذرة بدرجة لاسع . صوته الفخم مش متناسب مع هيافة كلامه .. كمان حسيت إنه زعلان من تحيّة كاريوكا أوى زى ما تكون كاريوكا بنت عمه وكان نفسه أنها تكون كويسة متقولش الكلام ده .

مكنتش عارفة أرد ..وعملت نفسي مشغولة في الموبايل ومش سامعة كويس ..  كنت بقول لنفسي ياريت لما نتطور أسئلتنا كمان تتطور معانا ..ياريت لما نجري نخدها تجري معانا ..ياريت نفك الجنزير اللى بيرجع دماغنا  لوراء واحنا في 2020 .

التطور مش إن إحنا نطلع القمر ونفك شفرة مفاعل نووي .. التطور الحقيقي  إن أحنا نسيب الناس في حالها طالما الموضوع ميهمناش.

صدقوني كل حاجة في حياتنا بيجرى ..إلا الهيافة مربوطة بجنزير .

الوسوم

مقالات ذات صلة

زر الذهاب إلى الأعلى
إغلاق
إغلاق