بروفايل

أجمل عريس ..اسألوني أنا

بروفايل : غادة أحمد

من سنتين تقريبا  احتفلت فرنسا بـ (عروسة إيفل)  أول بنت حلوة تتجوز برج حديد .. تابعت يومها المقــال اللي نشرتـه صحيفة لوفيجارو – أشهر الصحف الفرنسية – وشدتني بجد أوصاف العروسة جميلة وطويلة وأنيقة القوام.. قلت بيني وبين نفسي “إيه الهبل ده” ؟ معقول البنت الحلوة دي تسيب كل رجالة فرنسا اللي ملامحهم تجنن العقل وتتجوز حديد؟ دي إما مجنونة أو لابسها جنّ .

كمّلت المقال الرائع جدا لقيت الصحفي بيقول : أن البنت الجميلة متعلقة بالبرج بشكل فاق التصور ..ليها مكان ثابت مبتغيروش من ست سنين في حديقة قدام البرج .. كل يوم من سبعة لتسعة تروح تستناه لغاية ما ينوّر . تبصله بعنيها الحلوة وتتغزل وبعدين تسيبه وتمشي وتواعده بكره في نفس الميعاد .

كمّلت المقال الإبداعي لقيت الصحفي بيحكي الحكاية ويأكّد إن ده مش جواز بزفّه ودُخله وعيال ولا رسمي وعرفي ومسيار دا جواز بشكل جديد يشبه العشق من بعيد لبعيد . لا أيد بتلمس إيد ولا ابنيلك قصر عالى واخطف نجم الليالي ووعود خايبه اشتغلنا بيها العندليب.

عشق عذري جميل .. البنت شافت في ( إيفل العريس) إبداع التصميم وشموخ التاريخ .. شافت فيه العبقرية والعلو والكبرياء ..شافت أزاى الناس بتحبّه وتجيله من كل مكان . شافت شموخه وحست بقلبه كمان . شافت نوره اللي بيغطى مدينة ويفرّح كل الناس .. قالت مين من الرجالة عنده كل ده ؟ شموخ وعبقرية ونور وتاريخ وقلب كبير ..ولما ملقيتش راجل يستحق راحت قلتله شبيك لبيك .

حبّ يجنن من بنت عسل وعشق تحفة من بنت قمر .. وإيفل تقيل ساكت مبينطقش مش زى رجالتنا كلام كلام والآخر فنكوش .

اتجوزت العروسة إيفل برضاها يوم خميس لا لبست فستان أبيض ولا حطت ورد وشخاليل . بس لقيت فرنسا كلها بتغنلها وترقصلها في الشانزلزيه.

متستغربوش ..لما بنت تتجوز برج وللا قطر وللا ساعة وللا حتى سيارة  . دا أجمل أنواع العشق وأرقى أنواع الحبّ .. حبّ لا فيه كدب ولا نصب ولا مشاعر بتدوب زى التلج .

أنا غادة أحمد متجوّزة وعندى أولاد ..لكن بحبّ وبعشق مجلة اسمها بوردنج ..اعملولي بقه زفة في تحلية جدة وللا ميدان التحرير .. زغرتولي وارقصولي وقولولي مبروك . ما أنا حلوة زى القمر وكمان بوردنج تقيلة مبتنطقش.

الجواز مش راجل بشنب وعيال بتكبر بس قدام العين . الجواز احساس وصدق . لو لقتوه في حجر أوعى تسبوه .. استنوه من سبعة لتسعه .. أكيد هييجي عليه يوم وينطق.

 

 

الوسوم

مقالات ذات صلة

زر الذهاب إلى الأعلى
إغلاق
إغلاق