حكايات

وين الإعلان ياميسي ؟

بروفايل  : محمود الشيخ

لو مكناش محتاجين في مجلتنا  إعلانات كنا بجد بقينا بهوات .. نكتب مقالات وتحقيقات من غير جري ورا صفحة من بتاع كفته ولا محل حلويات . لو مكناش محتاجين إعلان مكناش رضينا نكتب عن شركة صابون فتحت جديد وللا مصنع حديد وللا فندق نص نجمة شايف نفسه سبع نجوم .

هي دي بجد الهموم ..مش عارفين نكتب وللا نجري ..نكتب مقال جميل وللا نطبّل للعميل ..نغير الرأى العام بكلمه وللا نحايل العميل بضحكة وسطر كله نفاق. هي دى الأزمة الكبيرة لما تفتح مجلة حلوة  .تبنى فيها أد ما تبني مفيش فايدة .الناس تشوفك ملك زمانك وأنت ياعيني مش عارف تنام .

كنا بجد حيرانين .  ومع الحيرة صدقوني لاتعرف تصنع فكرة حلوة ولا تكتب كلمة راقية ولا تحلق شويه في سما الابداع ..

أول ما اشتغلت في مجلة بوردنج كنت بشوف الحيرة في عين رئيسها ..أحاول أقوله ياريس أنسى ..أكتب دأنت قلمك حلو  يقولي أكتب عن ايه يا محمود؟ عن جمال السفاري وللا أجيب فلوس لعيالي؟ أكتب علشان الناس تفرح بالكلمة وللا أسدّ  إيجار الشقة؟ أعمل قضية ترسم مستقبل وللا أروح أنام واتنيل .

مش هنسى ابدا حوار يتباع بالألوفات كتبناه لرجل أعمال كبير ..قرأ الحوار وبحلق عنيه وقال : الله الله إبداع  ..قلتله ابسط باريس بكره هتضحك الدنيا والفلوس تدخل الخزنه دا الراجل ده نايم على ملايين .

عشنا تلت ساعات فرحانين وجينا الصبح ملقناس المدير قبلنا السكرتير  قالي كلمتين ..انت يا أستاذ محمود كل حوار تكتبه تاخد عليه فلوس ؟ قلتله لأ لكن دي شركة قال : لو كتبت عن ميسي تاخد فلوس قلتله لأ دا نجم و حواره فرصه قال إحنا المدير بتاعنا زى ميسي كمان أنت كاتب كلام زى العربية البي أم وإحنا بقه ياسيدي بنركب تويوتا .

رديت قلتله ميسي إيه وتويوتا مين ؟ .فين فلوس الحوار ياعبد الحميد .عمل فيها عبيط  زاد وعاد في حكاية ميسي والبي ام والتويوتا لغاية ماعرفنا الفوله  وقولنا سلام .

في العربية بصيت في عيون الريس لقيته حيران  وكمان زعلان قلتله : فكّها ياباشا هتفرج والله  وبعدين مقدرتش امسك نفسي من الضحك ..قلتله  مابلاها لعبة الاعلان دي مش بتاعتنا ..نجيب بنت حلوة تشتغل في التسويق ونقعد احنا على مكاتبنا. التسويق ده له ناس وإحنا ياريس ملناش فيه . بننكسف زيادة والناس بتضغط على الخجلان وتضحك عالمكسوف .

جبنا البنت الحلوة قالت يا استاذ محمود عندكم عملاء ؟ قلتلها طبعا وفكرت أبعتها لعبد الحميد ..ساعه ورجعت بعشرين ألف  .قلتلها قوام كده ؟ طيب كلمك عن ميسي قالت لأ رحب بيه وجابلي الشيك ولا قالك : تويوتا قالت : لأ جابلى شاى وكيك .

دخلت على الريس بالفلوس . وقلت : الواضح ان العيب فينا ..عبد الحميد جبلها كيك وأداها شيك و قالها اعتبري المكتب مكتبك وإحنا قعدنا نهاتي ونزيد ونعيد شقلطنا بميسي والعربيات .. الدنيا دى ياريس أذواق وأرزاق ومش كل الودان تلبس حلق .

**

اللي في الصورة دي مش عبد الحميد دى اللي جابت الشيك من عبد الحميد وبيتهيألي وأظن وأتوقع إنها ممكن تجيب أد الشيك ده تلت مرات من عبد الكريم  وعبد الرءوف وعبد السلام . أما أنا ورئيس التحرير لو رقصنا في الضلمة منجبش ربع إعلان . المشكلة مش فينا . المشكلة في الأيام الوحشه اللي خلت أصحاب القلم الحلو يخبطوا على البيبان ..بلاها إعلان

 

مقالات ذات صلة

زر الذهاب إلى الأعلى