من هنا وهناك

غادة أحمد تكتب : نص راجل ونص ست

بروفايل : غادة أحمد

متحسدوش حدّ على غربته وتعدّوا عليه سنينه وفلوسه .دي الغربة همّ ما يتلّم . وخسارة المسافر أكتر من مكاسبه حتى لو رجع لبلاده بمال قارون .. بلاش نظرة العين اللي تموّت ..أنا شفتهم وعاشرتهم سنين لقيت فيهم المهموم والمديون واللي نايم يحلم بحضن مراته واللي نفسه يشوف ولاده واللي بيقضّيها شوية فول .. غربة إيه اللي بتحسدوا عليها الناس وفين هيه فلوس قارون ؟!!! ما قارون غرق من زمان.

الحكاية اللي عايزه أقولها حكاية الفُرقة والبعاد والفلوس اللي بقت جدار بين زوج وزوجة وصنعت مسافات. صدقت بجد نادية مصطفى لما غنّت سلامات سلامات . وغربة ايه اللي تخليك تنسى ناس بيموتوا فيك.

إيه اللى يعوّض الست عن صوت الراجل في البيت وإيه اللي يعوّض الولد عن أبّ يقوله بحبك.لا فلوس بتنفع ولا كنوز.

المشكلة الحقيقية في الإدمان ..اللي بيسافر بينسى روحه وتجري منه السنين .فجأة وفي غمضة عين يلاقي نفسه بعيد عن ناسه عشر سنين ويمكن عشرين . والست هناك قايمة بدور راجل والأولاد عايزين بابا .. والراجل واقف بين طريقين . لاسعادة طايلها ولا فلوس لاقيها . وحياته من كرب لهمّ ومن همّ لكرب .هى دي الغربة في كلمتين.

صدقوني غربة زمان وفلوس زمان خلصت في 2020. محدّش لا بيعمل ثروة ولا يحزنون .هيه سنين بتضيع من غير تمن وعُمر بيجري ومبيرجعش والآخر نعيّط على الأيام ونقول ياللا حُسن الختام .

كلامي مش كلام في الهوا دأنا صحفية وفاهمة ..عشت معاهم وجواهم سنين طويلة . وزنت كلامهم بالعقل والقلب كمان . لقيت الكل غلطان ومفيش ضحيّة إلا ست بتعيش مع جوزها عالتلفون .تكلمه عن الأولاد الخط يقطع وتقوله بحبك والصوت يقطّع  ولما تمرض وتتوجع متلقيش غير مخدة فاضية واربع حيطان .

بدل ما نقول ياللا حُسن الختام ما ترجع قوام .. تشوف زوجة قبل ما تكبر  وعيّل قبل ما يبقاله شنب .. ترجع لسرير فاضى وحضن غايب . ترجع تصحي مشاعر قرّبت تدبل ويمكن تموت .. ارجع قبل مراتك ما تسألك أنت فين تقريبا شفتك قبل كده .

لو بس الرجالة نفهم أن الزوجة الحلوة فلوس كانت اتغربت فيها وجواها .. هو ده المكسب الحقيقي .

فكر قبل حُسن الختام . فكر وحس قبل ماتبقى نص راجل وهيه كمان نص ست .

مقالات ذات صلة

زر الذهاب إلى الأعلى