من هنا وهناك

بيني وبينكم ..الحكاية سرّ متقولهاش لحد (3)

بوردنج – الصحفي الخفيّ

أوعى تحبّ عالنت و لا تعشق عالفيس بوك .. كده أنت داخل في نفق ضلمة .مش عارف اللى بتغازلها ولد وللا بنت . ورغم المآسي اللى بتحصل والمقالب اللي بتتكرر كل يوم . لسه بنلاقي على النت حكايات وغراميات ودموع وأنين عاشقين .

أوعى تحب عالنت لأحسن تكون نهايتك زي نهاية مجاهد . هتسألوني طبعا مين مجاهد ؟ هقولكم واحد صاحبي متعرفهوش .

مجاهد من السودان حبّ سارة من لبنان ..معرفش إيه بالظبط اللى لمّ الخيار على بلح الشام .. هو النت المنيّل على عينه جمع الراسين ياريت في الحلال . لأ على صفحة كلها حواديت وكلام .. سارة تقوله بحبك يازول وهو نازل فيها هيام.

تلت سنين وأنا جنب مجاهد في المكتب . طول النهار فاتح الفيس والانستجرام وماسك الواتس في ايده .. ياحبيبي اشتغل يقول : استني ياريس . رسالة ورا صورة وصورة ورا رسالة وضحكة ورا نكته لغاية مالجريدة كلها بقت مشغولة بسارة .

حاجة شياكة وفخامة وجمال وحلاوة وهيك وميك ومجاهد ياعيني غلبان مشفش في حياته لحمه بيضا ولمّا ربنا كرمه شاف الأبيض كله .. كنت براقب مجاهد من بعيد لقيت الراجل اتغيّر ..صوته اتغيّر ولسانه كمان وإلاّ وإلاّ يسافر لبنان.

ياحبيبي هناك ثورة والشارع فيه مظاهرة وسارة تلقيها بتهتف وشايلينها مش فاضية. أبدا أبدا لازم يروح لبنان يشوف حلم عمره وحياته كمان .

اتصل بيها قالها أنا جاى بكره وعايز أشوفك .. قلتله أزاى ياميجو  إحنا عيلة محافظة لا بنقابل حدّ ولا بنكشف على رجالة . قالها دا أنا جاى مخصوص ياسارة ..قلتله أهلي ياميجو يموتوني .فادى أخويا بيلاحقني ومراقب بالليل سهري ولو شافك هيقتلني .دأنت متعرفش فادي بيخاف عليه زى عنيه وحاطط مسدس في جيبه وسكينه في ايديه.

رجّع مجاهد التذكرة وكمّل مشوار الحبّ عالنت . سارة طلبت موبايل جاب أحلى موبايل ..سارة عندها ظروف بعت المصروف .سارة زعلت وغابت بعت نص الراتب ..سارة طالعة رحلة اشترالها الشنطة .. سارة دخلت المستشفى غاب يومين زعلان  سارة اتقدملها واحد مكنش عارف ينام..سارة بتحاول تعدى الأزمات ومجاهد بيبعت ريالات .. تلت سنين لغاية ما مجاهد فلّس وسارة شبعت فلوس ..وفي الآخر سارة عملت بلوك و الزول جاله سكر وشلل رعّاش.

سارة مخدتش شقا عٌمر مجاهد بس .سارة حرقت أعصاب جريدة كاملة ..احلى أعداد طلعت وسارة بتضحك والطباعة بتتأخر لو سارة زعلت . وفي الآخر شلل و بلوك.

لما تحبّ عالنت هتبقى زى مجاهد ..ولو سألتوني مجاهد مين ؟ هقولكم واحد صاحبي متعرفهوش.

الكلام دا بيني وبينكم .. الحكاية سرّ.. متقولهاش لحد .

 

مقالات ذات صلة

زر الذهاب إلى الأعلى